Sports News » --मैदानमा ढलेर फुटबल खेलाडी गोमेजको मृत्यु..

ब्युनस आयर्स : बेलाबेलामा खेलका क्रममा मैदानमै ढलेर खेलाडीको मृत्यु हुनु, अब नौलो रहेन। यस्तै मैदानमै ढलेर खेलाडीको मृत्यु भएको अर्को घटना अर्जेन्टिनामा सार्वजनिक भएको छ। अर्जेन्टिनाको क्लब फुटबलका क्रममा मैदानमा ढलेका खेलाडी क्रिस्टियन गोमेजको मृत्यु भएको छ।

बी डिभिजन लिगअन्तर्गत बोका उनिडोसविरुद्धको खेलका क्रममा एटलेटिको पारानाका खेलाडी गोमेजको मत्यु भएको हो। २७ वर्षीय गोमेज खेल सुरु भएको आधा घन्टापछि मैदानमा ढलेका थिए। उनको अस्पताल लैजाँदै गर्दा मृत्यु भएको बोका उनिडोसका चिकित्सक मिगुएल डारले जानकारी दिएका छन्।

गोमेज एक्कासि मैदानमा लडेपछि टिमका साथीले उनको जर्सी खोलेर चिकित्सकलाई बोलाएका थिए। खेलका सुपरभाइजर रामोन गोमेजले खेलाडीको अप्रत्याशित निधन अविश्वसनीय र दु:खदायी भएको बताए। एक साताअघि मात्र अर्जेन्टिनाको लिग सुरु भएको हो।

गत मे १४ मा २१ वर्षीय इमानुएल ओर्टेगाको पनि मैदानमा लडेर मृत्यु भएपछि एक साताका लागि लिग रोकिएको थियो। एक साता रोकिएर सुरु भएको लिगमा फेरि अर्का खेलाडीको निधन भएपछि पुन: रोकावट आउने भएको छ। स्रोत : अन्नपुर्णपोस्ट