News » यस्तो ‘सुसाइड नोट’ लेखेर गाविस सचिव झुन्डिए

भोजपुर : भोजपुरको धोद्लेखानी गाविसका सचिव गोपाल चिमरिया कार्यालयमै झुन्डिएको अवस्थामा भेटिए । शनिबार बिहान कार्यालयमै झुन्डिएको अवस्थामा भेटिएका उनको साथबाट प्रहरीले ‘सुसाइड नोट’ सुसाइड नोट भेट्टायो ।

डायरीमा लेखेको सुसाइड नोटमा भुकम्पपीडितको राहत र खुला दिसामुक्त गाविस घोषणाका लागि आफूले भनेजस्तो गर्न नसकेकोमा मृत्यु रोजेको उल्लेख गरिएको छ ।
उनका सहकर्मी देउराली गाविसका सचिव खड्गबहादुर पौडेलका अनुसार सामाजिक सुरक्षा र विकास योजना अघि बढाउन गाउँमा सहज वातावरण नभएकाले आफू आत्महत्या गर्न बाध्य भएको विवरण सुसाइड नोटमा लेखिएको छ ।
सचिव चिमरियाले केहिदिनअघि कार्यालय प्रमुख तथा भोजपुर जिविसका स्थानीय विकास अधिकारीसमक्ष धोद्लेखानीमा काम गर्न नसक्ने भन्दै अर्को गाविसमा सरुवाको लागि अनुरोध गरेको समाचार स्रोतले बताएको छ ।
उनले सुसाईट नोटमा आफ्नो परिवारको व्यवस्थापनमा कमजोरी भएको लेखेका छन् । गाविसको कार्यभार राम्रो नभएको तथा परिवारलाई समेत समय दिन नसकेकाले मानसिक तनावमा आएर उनले आत्महत्या गरेको खुलेको हो ।
चिमरियाको शव जिल्ला अस्पताल भोजपुरमा पोष्टमार्टम गरि आइतबार परिवारको जिम्मा लगाइएको छ ।
यसैबीच भोजपुरका गाविस सचिवहरुले श्रद्धाञ्जली कार्यक्रम गरी जनप्रतिनिधि नभएका बेला एक्लो गाविस सचिवलाई दर्जनौं मन्त्रालयको काम थोपर्दा गम्भीर समस्या आएको जनाएका छन् ।
उनीहरुले कार्यस्थलमा सरोकारवालाले सहयोग नगर्ने प्रवृत्तिले सहकर्मी गुमाउनुपरेको भन्दै सम्बन्धित पक्षको ध्यानाकर्षण गरेको छ ।
संखुवासभाको धुपु घर भइ हाल मोरङको कोशी हरैंचा नगरपालिका–३ निवासी २९ वर्षीय चिमरिया ६ महिनाअघि मात्र निजामति सेवामा प्रवेश गरेका थिए । उनका पत्नी र एक छोरा छन् । वीएस्सी उत्तीर्ण चिमरिया निजामति सेवामा आउनुअघि शिक्षण पेशामा संलग्न थिए । source:annapurnaoost