News » एसएलसी फेल भएपछि १७ वर्षको उमेरमै खतरनाक अपराधी बने विद्यार्थी

अपराध ब्युरो
काठमाडौं, असार १९ – एसएलसीको परिक्षामा असफल बनेपछि एक विद्यार्थीले अपराधको बाटो समात्न पुगेका छन् । यसरी पढ्दापढ्दै संगठित अपराधको बाटो समात्न पुगेका विद्यार्थी हुन्, १७ वर्षीय दिपेश लामा ।
नुवाकोट घर भई हाल काठामाडौंको फुटुङमा बस्दै आएका लामा काठमाडौंकै गोंगबुस्थित भण्डारी टोलमा बस्ने सीताराम पाण्डेमाथि सांघातिक हमला गरेको आरोपमा पक्राउ परेका छन् ।

४२ वर्षीय पाण्डेमाथि शुक्रबार साँझ साढे ६ बजेतिर गणेशस्थानमा हिँडिरहेको बेला स्कुटरमा चढेका दुई अपरिचित व्यक्तिहरुले धारिलो हतियार प्रहार गरेका थिए । हतियार प्रहारपछि घाइते बनेका पाण्डेको अहिले शिक्षण अस्पताल महाराजगञ्जमा उपचार भइरहेको छ ।
घटनाबारे प्रहरीले अनुसन्धान गर्दै जाँदा आक्रमणकारीले बा ५२ प १८२१ नम्बरको कलेजी रंगको स्कूटर प्रयोग गरेको खुल्न आएको थियो । प्रहरीको अपराध महाशाखाबाट प्र.ना.उ. रमेश थापाको नेतृत्वमा खटिएको अनुसन्धान टोलीले घटनामा प्रयोग भएको बा। ५२ प १८२१ नम्वरको स्कुटीसहित दिपेश लामालाई घरबाटै पक्राउ गरेको थियो ।
प्रहरीका अनुसार लामा र उनको साथी मिलेर कसैको निर्देशनमा हतियार प्रहार गरेका हुन् । यसबारेमा थप अनुसन्धान भइरहेको प्रहरीले बताएको छ ।
www.ratopati.com