Filmy Khabar » पत्रकार संघले ‘हिम्मतवाली’का कलाकार सुदर्शन गौतमलाई बहिष्कार गर्ने

चलचित्र पत्रकार संघले ‘हिम्मतवाली’का कलाकार सुदर्शन गौतमलाई बहिष्कार गर्ने निर्णय गरेको छ । सुदर्शनलाई १५ दिन भित्र पत्रकार श्याम सुन्दर गिरीलाई ज्यान मार्ने धम्की दिएको बिषयमा आफ्नो स्पष्टिकरण दिन संघले गरेको आग्रहलाई वेवास्ता गरेपछि उनलाई बहिष्कार गर्ने निर्णय संघले गरेको छ ।

यस्तै, संघले संघका सदस्यहरु श्याम सुन्दर गिरी, अनुप भट्टराई र रवि अधिकारीलाई प्रकाशित समाचारका आधारमा स्पष्टिकरण सोधेको थियो । जसमा श्यामको जवाफमा केही सहमती र केही असमती भएको भन्दै आउँदा दिनमा संघका बिषयका समाचार प्रकाशन गर्दा ध्यान दिन सचेत गराएको छ ।
यस्तै, अर्का सदस्य अनुप भट्टराईले पठाएको स्पष्टिकरण  चित्तवुझ्दो नभएको र संघले  पठाएको आन्तरिक स्पष्टिकरणको खिल्ली उठाउने काम गरेको भन्दै उनलाई ६ महिनाका लागि निलम्बित गर्ने निर्णय गरेको छ ।
संघले चितवन शाखाका अध्यक्ष समेत रहेका रवि अधिकारीलाई पनि समाचारका बिषयमा स्पष्टिकरण सोधेको थियो । तर, उनको जवाफ अमर्यादित, उच्छृङ्खल र चित्तवुझ्दो नभएकाले उनलाई संघको साधारण सदस्य समेत नरहने गरि निष्काशन गर्ने निर्णय गरेको छ ।
साथै उनले सम्हाल्दै आएको चितवन शाखाको अध्यक्ष पदमा उपाध्यक्ष रामेश्वर रिजाललाई कार्यवाहक अध्यक्षको जिम्मेवारी दिइएको छ । चितवन शाखालाई ३ महिना भित्र चुनावी सभा गर्नका लागि निर्देशन पनि दिइएको छ ।source:onlinekhabar