News » एमाओवादी नेताद्धारा पिसाब फेर्न निस्केकी विवाहित महिलालाई गोठमा लगेर बलात्कार

२०७२ जेठ ४ गते
काठमाडौं, ४ जेठ । एकीकृत नेकपा माओवादीका जिल्लास्तरीय एक नेताले पिसाब फेर्न निस्केकी महिलालाई गाईको गोठमा लगेर बलात्कार गरेको खुलासा भएको छ ।

एमाओवादीका मुगुका जिल्ला सचिवालय सदस्य धैनाकोट-६का ३७ वर्षीय रामजंग शाहीले सोही गाविसकी एक महिलालाई बैशाख २३ गते राति बलात्कार गरेको प्रहरीले जनाएको छ । प्रहरीका अनुसार एमाओवादी जिल्ला सदस्य शाहीले बैशाख २३ गते राति पिसाब फेर्न निस्केकी ति महिलालाई मुख थुनेर गाई गोठमा लगेर बलात्कार गरेका थिए ।
बलात्कार गरेर सोही राति शाही गाउँबाट फरार भएका थिए । दुई सातादेखि फरार शाहीलाई गाउँलेले मुद्दा मिलाउने आश्वासन दिएर घर बोलाएका थिए । शाही गाउँ फर्केपछि घरभित्र थुनेर गाउँलले सोमबार प्रहरीको जिम्मा लगाएका छन् ।
पीडित महिलाले आफुलाई बलात्कार गरेको भनेर श्रीमानलाई जानकारी गराएकी थिईन् । पीडित परिवारले बलात्कार भएको थाहा पाएपछि शाहीमाथि कारबाही माग गर्दै दुईहप्ता अगाडी नै प्रहरीमा उजुरी दर्ता गरेका थिए ।
गाउँलेको सहयोगमा मुगु प्रहरीले सोमबार अभियुक्त शाहीलाई पक्राउ गरेर हिरासतमा राखेको छ । थप अनुसन्धानका लागि सोधपुछ भइरहेको जिल्ला प्रहरी कार्यालयले जनाएको छ ।
पीडित महिलाको सोमबारै स्वास्थ्य परीक्षण गरिएको छ । स्वास्थ्य परीक्षणमा पनि बलात्कार भएको पुष्टि भएको छ । जिल्ला प्रहरी कार्यालय मुगुका इन्सपेक्टर मित्रबहादुर आर्चायले घटनाको थप अनुसन्धान गरी कारबाही प्रक्रिया अघि बढाइने जानकारी दिनुभयो ।
स्रोत - दैनिक नेपाल