सस्तोमा साउदी रियाल साट्न खोज्दा डेढ लाख गुम्यो

काठमाडौं: संखुवासभा चित्लाङका समिर घलेले सस्तोमा साउदी रियाल साट्न खोज्दा आफूसँग भएको डेढ लाख रुपैयाँ गुमाएका छन्। घलेले आइतबारमात्रै चिनजान भएका दुईजना युवासँग कोटेश्वरस्थित गेस्टहाउसमा बसेर खानपिनसमेत गरेका थिए।

मलेसिया जान भनेर हिँडेका घलेलाई ती लुटेराले साउदी रियालसमेत देखाएका थिए। उनीहरूले सय दरका सयवटा नोट देखाएर डेढ लाख रुपैयाँमा साटिदिने भन्दै घलेलाई प्रलोभनमा पारेका थिए।

महानगरीय प्रहरी वृत्त बानेश्वरका प्रमुख डीएसपी दानबहादुर कार्कीका अनुसार डेढ लाख खर्च गरेपछि डेढ लाख नै फाइदा हुने मनसायले घलेले सोमबार बिहान बैंकबाट पैसा निकालेका थिए। 

कोटेश्वरस्थित सार्वजनिक शौचालयमा पस्दा झोला बोक्न दिएका घलेले बाहिर निस्कँदा दुवैजनालाई नदेखेपछि प्रहरीलाई खबर गरेका थिए।

सुरुमा पैसासहितको व्याग लिएर साथी फरार भएको सूचना दिएका घलेले पछि सस्तोमा रियाल साट्न खोज्दा ठगिएको बयान दिएका हुन्।

प्रहरीले ती फरार भएका दुईजनाको खोजी गरिरहेको छ। स्रोत अन्नपूर्ण पोस्ट 

Labels: Business, News